"Wo mir di vor öpe 6 Jahr kenne glernt hei, si mir zwöi es Päärli gsi. Du hesch üs als Doppelpack kenne glernt u du kennsch üs immer nu als Doppelpack. Dass mir scho lang kes Päärli meh si, passt scho fasch gar ned ids Bild! :-) Üsi gmeinsami Fründschaft z Dritt. het nes dür das um so meh zämegschweisst u mir gniesse jede Ougeblick, wo mir mit dir dörfe vrbringe. Mir kenne di als Pfärdestählerin. Als Eini, wo immer für jede Seich z ha isch. Da drbi bisch du immer soooo schön guet glunt. I all dene Jahr hei mr di sälte mal köhre jammere. Im Gägeteil, du hesch üs zueglost, wes üs mal isch schlächt gange isch. Du bisch ou immer uf Achse, aber das würd di nu lang ned drvo abhalte, vom aller hinderschte Ort vor Wält cho z springe, um üs us dr Patsche z hälfe. Mir chöi immer uf di zelle u das isch es wunderschöns Gfüehl. Es Gfüehl, wo mr hei glehrt schetze I üsne junge 24 Jahr. Mir schribe äxtra ned häre, dass mr hoffe, dass üsi Fründschaft für ewig ahaltet. Du weisch, dass mr nes scho mal us dä Ouge vrlore hei – aber so wit wärde mrs nie meh la cho, das vrpräche mir dir. Für das bisch du üs eifach scho viel z fescht ad's Härz gwachse u mir hei di eifach z lieb für dass mr uf so nä tolli Fründschaft chönte vrzichte.

Als Dancingqueen bisch du absolut unschlagbar. Mir si so öpis vo stolz druf, scho itz vo dr zuekünftige beschti Tanzlehrerin Privatunterricht z becho, ou wenn du ab und zue chli sträng mit üs bisch! ;-) Es fägt immer mega mit dir u mir gniesse die Zyt, wo du da dri investiersch. Mir gloube a di u dini Ziel. Drum wärde mir die ou immer drbi unterstütze."

Stefanie Ryter und Daniel Infanger